Харилцаа холбоо, мэдээллийн технологийн салбарын аж ахуйн нэгж, байгууллага, мэдээллийг боловсруулагч, хэрэглэгчдэд статистикийн үзүүлэлт, тэдгээрийн ойлголт, тодорхойлолтыг нэг мөр болгож, нэгдсэн арга зүйгээр хангах зорилготой “ХАРИЛЦАА ХОЛБОО, МЭДЭЭЛЛИЙН ТЕХНОЛОГИЙН САЛБАРЫН СТАТИСТИКИЙН ҮЙЛ АЖИЛЛАГААНЫ ӨНӨӨГИЙН БАЙДАЛ, ОЛОН УЛСЫН ЧИГ ХАНДЛАГА” сэдэвт арга хэмжээ энэ сарын 22-23-нд ГХЯ-ны хурлын танхимд боллоо. Уг арга хэмжээг Засгийн газрын тохируулагч агентлаг Харилцаа холбоо, мэдээллийн технологийн газар, Харилцаа холбооны зохицуулах хороо, Үндэсний статистикийн хороо, Олон улсын цахилгаан холбооны байгууллага (ITU) хамтран зохион байгуулж байна. Дэлхийн мэдээлэлжсэн нийгмийн өдрийг тохиолдуулан Монгол Улсад анх удаа зохион байгуулж буй энэхүү арга хэмжээнд Нийслэлийн мэдээлэл технологийн газар, Нийслэлийн статистикийн газар, Төрийн мэдээлэл холбооны газар, МУИС, ШУТИС, Хүрээ дээд сургууль зэрэг харилцаа холбооны чиглэлээр үйл ажиллагаа явуулдаг төрийн болон төрийн бус байгууллага, аж ахуйн нэгжүүдийн төлөөлөл болох 120 орчим оролцогч хамрагдлаа.
Хоёр өдөр үргэлжлэх энэ арга хэмжээнд Олон улсын цахилгаан холбооны байгууллагын төлөөлөл Висит Атипаяакүүн, ахлах статистикч Эсперанза Магпантай, зөвлөх H.E.Коая нар
- Тогтвортой хөгжлийн зорилго, Олон улсын Коннект 2020 хөтөлбөр
- Мэдээлэл, харилцаа холбооны хөгжлийн индекс
- Мэдээлэл, харилцаа холбооны хөгжлийн төлөөх түншлэл
- Улс орнуудын мэдээлэл хариуцагчид (Focal Points), тулгамдсан асуудлууд ба өгөгдлийн цоорхойг (Data Gaps) шийдвэрлэх
- Бусад улс орны статистик үйл ажиллагааг зохицуулах шилдэг туршлага
- Өгөгдөл цуглуулах, тархаах арга, процедур
- Нууцлалын асуудлууд зэрэг олон сэдвийн хүрээнд илтгэл хэлэлцүүлэв.
Дашрамд сонирхуулахад, Олон улсын цахилгаан холбооны байгууллагын дэлхийн улс, орнуудын Мэдээллийн технологи, харилцаа холбооны хөгжлийн 2016 оны түвшинг харуулсан судалгаанд Монгол Улсын МТХХ-ны хөгжлийн индекс 4.95 болж дэлхийн 175 орноос 90 дүгээрт, НҮБ-ын Эдийн засаг, нийгмийн асуудал эрхэлсэн газрын “Цахим засаг-2016” судалгаанд цахим засгийн хөгжлийн индекс 0.5194 болж 193 орноос 84 дүгээрт тус тус жагсаж дэлхийн дундаж түвшинд эрэмбэлэгдэж байна.