Олон Улсын Цахилгаан Холбооны байгууллага (ITU)-ын Цахилгаан холбооны хөгжлийн товчоо (BDT)-оос 2020 оны 9-р сарын 14-өөс 17-ны өдрүүдэд Цахилгаан холбоо, мэдээлэл холбооны технологийн үзүүлэлтийн шинжээчдийн бүлгийн (EGTI) 11-р уулзалт, Мэдээлэл харилцаа холбооны технологийн /МХХТ/ өрхийн үзүүлэлтийн шинжээчдийн бүлгийн 8-р уулзалтыг цахим системээр зохион байгууллаа.
Уулзалтад гишүүн орнуудын 300 орчим төлөөлөл оролцсон бөгөөд Монгол Улсыг төлөөлөн Харилцаа холбоо, мэдээллийн технологийн газрын ХХШБЗГ-ын ахлах мэргэжилтэн А.Уранчимэг, ХШҮДАА-ны ахлах мэргэжилтэн Б.Цэцэг нар оролцож, олон улсын туршлага, танилцуулга, мэдээлэл солилцож ажиллалаа.
Цахилгаан холбоо, мэдээлэл холбооны технологийн үзүүлэлтийн шинжээчдийн бүлгийн (EGTI) 11-р уулзалтаар гишүүн орнуудын МХХТ-ийн хөгжлийн индексийн үзүүлэлтүүдийн боломжит, хүртээмжтэй өгөгдөлд тулгуурлан бодитой гаргах саналууд, 5G, МХХТ-ийн үнэ, үйлчилгээний чанар, олон улсын роуминг-той холбогдох үзүүлэлтүүдийг тооцох судалгааны танилцуулга зэрэг асуудлуудыг танилцуулж, хэлэлцүүллээ. Мөн МХХТ-ийн захиргааны өгөгдөл цуглуулах гарын авлага (Handbook for the Collection of administrative data on Telecommunications/ICT, 2020)-ыг танилцуулсан баримт бичгийг танилцуулав.
Мэдээлэл, харилцаа холбооны технологийн өрхийн үзүүлэлтийн шинжээчдийн бүлгийн 8-р уулзалтаар МХХТ-ийн ур чадвар, интернэт хэрэглэгчдийн үзүүлэлтийг оновчтой тооцох арга, туршлага, Филлипин улсын 2020 оны эхний улиралд хийсэн МХХТ-ийн хувь хүн, өрхийн судалгааны талаар болон бусад улсын судалгааны туршлага зэрэг сэдвээр танилцуулга, хэлэлцүүлэг хийв.
Мөн Олон улсын Цахилгаан холбооны байгууллагаас 2020 онд гаргаж байгаа “Хувь хүн болон өрхийн мэдээлэл, харилцаа холбооны хүртээмж, хэрэглээний түвшинг хэмжих аргачлал” (Manual for Measuring ICT Access and Use by Households and Individuals-2020)-ыг танилцуулав.
Тус уулзалтад НҮБ-ын Эдийн засаг, нийгмийн газраас улс орнуудын статистикийн байгууллагуудаас гаргасан COVID-19-тэй холбоотой судалгааны үр дүнг танилцууллаа.
EGTI, EGH уулзалтууд нь МТХ-ны статистик, мэдээлэл цуглуулах чиглэлээр ажилладаг ОУЦХБ-ын бүх гишүүд, шинжээчдэд нээлттэй. Энэ талаар дэлгэрэнгүй мэдээллийг ЭНД дарж аваарай.
МХХТ-ийн хөгжил, дэвшилд тулгуурлан улс орныг хөгжүүлэхэд мэдээлэл, харилцаа холбооны дэд бүтэц, түүний хүртээмж, хэрэглээ, хөгжлийн үзүүлэлтийг тодорхойлох, салбарын нийгэм, эдийн засгийн хөгжилд үзүүлэх үр нөлөөг тооцох статистик мэдээ, өгөгдөл цуглуулах, харьцуулсан судалгаа, хяналт-шинжилгээ хийж үнэлж дүгнэх нь чухал ач холбогдолтой юм.
Олон улсын цахилгаан холбооны байгууллага(ОУЦХБ)-аас олон улсын МХХТ-ийн хөгжлийн индекс (ICT Development Index-IDI) тооцох үзүүлэлт, тодорхойлт, аргачлал гаргаж хөгжүүлэх, олон улсын МХХТ-ийн хөгжлийн түвшинг гаргах, нийтэд мэдээллэх талаар гишүүн орнуудтайгаа хамтран ажилладаг.