Мэдээллийн технологи, шуудан, харилцаа холбооны газрын БНҮҮС-аас санхүүжүүлсэн “Орон нутагт мэдээлэл харилцаа холбооны нэг цэгийн үйлчилгээний төв байгуулах” төслийг Дорноговь аймгийн Дэлгэрэх суманд хэрэгжүүлэн 10 дугаар сарын 20-ны өдөр нээж ашиглалтанд орууллаа.
Тус төв нь:
- Үүрэн холбоо
- Шуудан
- Интернэт
- Цахилгаан холбоо
- Телевиз, радио
- Мэдээлэл сургалт явуулах үйлчилгээг үзүүлэхээс гадна Монгол Улсын Засгийн газраас ойрын жилүүдэд хэрэгжүүлэхээр төлөвлөөд байгаа Шилэн кабелийн өндөр хурдны өргөн зурвасын сүлжээгээр дамжуулан хүргэж болох цахим эрүүл мэнд, оношлогоо, цахим худалдаа, алсын зайн сургалт, гибрид шуудан, төрийн үйлчилгээг авах суурь боломжийг бүрдүүлэх, сүлжээгээр дамжуулан улс дотроо болон гадаад ертөнцтэй холбогдох боломжоор хангах юм. Мөн Цахим засаглал буюу төрийн үйлчилгээг иргэдэд онлайнаар хүргэх ажлыг хэрэгжүүлэх боломжтой болно.
Энэхүү нэг цэгийн үйлчилгээний төв нь орчин үеийн технологийн шийдэл, үйлчилгээний нөхцлүүдийг бүрэн хангасан ба нутгийн иргэдийг тав тухтай үйлчлүүлэх бүх боломжоор хангаж өгснөөрөө давуу талтай. Төслийн хүрээнд Баян-Өлгийн аймгийн Толбо сум, Төв аймгийн Угтаал сумдад үүнтэй адил нэг цэгийн үйлчилгээний төв, сүлжээний цамхагийн хамт, Завхан аймгийн Түдэвтэй суманд сүлжээний цамхаг тус тус баригдаж дууссан бөгөөд байгууламжуудыг тун удахгүй хүлээн авч ашиглалтанд оруулах юм.
