Бүгд Найрамдах Турк Улсын Истанбул хотноо 9 дүгээр сарын 21-23-нд зохион байгуулагдсан Дэлхийн шуудан холбооны Бүрэн эрхт төлөөлөгчдийн 26 дугаар их хурал боллоо. Хуралд Монгол Улсыг төлөөлөн Харилцаа холбоо, мэдээллийн технологийн газрын дарга Б.Чинбат, тус газрын Сансрын холбооны албаны дарга Ц.Гантөгс, Харилцаа холбооны зохицуулах хорооны дарга С.Адьяасүрэн болон уг хорооны Шуудангийн хэлтсийн ахлах мэргэжилтэн Б.Мягмарнаран нар оролцов.
Шуудангийн салбарын удирдлагын түвшинд дөрвөн жилд нэг удаа зохион байгуулагддаг энэхүү хуралд Дэлхийн шуудан холбооны гишүүн 192 орны болон олон улсын байгууллагуудын 2000 гаруй төлөөлөл оролцсон байна.
Манай төлөөлөгчид Дэлхийн шуудан холбооны Ерөнхий захирал Бишар А. Хусэйн, дэд захирал Паскал-Тиери Кливаз болон Ази, номхон далайн бүсийн асуудал хариуцсан зохицуулагч Хиаоли Фу нартай албан уулзалт хийлээ. Уулзалтын үеэр Монгол Улс гишүүн орны үүргээ нэр төртэйгээр биелүүлж ирсэнийг Дэлхийн шуудан холбооны зүгээс онцлоод, цаашдын хамтын ажиллагаагаа идэвхтэйгээр үргэлжлүүлэн, мэргэжилтэй боловсон хүчнийг хөгжүүлэх, чадавхийг нь бэхжүүлэхэд бүх талаар дэмжин ажиллахаа илэрхийлсэн байна.
